پاکستان تحریک انصاف کے سابق رکن پنجاب اسمبلی شبیر گجر کیخلاف 10 دفعات کے تحت مقدمہ درج کر لیا گیا۔ پولیس کے مطابق پی ٹی آئی کے سابق ایم پی اے شبیر گجر کے خلاف تھانہ ستوکتلہ میں سب انسپکٹر ضیا الحق کی مدعیت میں مقدمہ درج کیا گیا، مقدمہ میں شبیر گجر سمیت سات نامعلوم افراد کو نامزد کیا گیا ہے۔ شبیر گجر کیخلاف مقدمہ پولیس جوان شہباز سے سرکاری رائفل چھیننے، پولیس اہلکار راحت کی وردی پھاڑنے، اقدام قتل، پولیس پر حملہ آور ہونے سمیت 10 دفعات کے تحت درج کیا گیا ہے۔ ایف آئی آر کے متن میں لکھا گیا ہے کہ ویلنشیا ٹاون کے قریب دو گاڑیوں کو پولیس ناکہ پر روکا گیا، گاڑیوں میں موجود 7 سے 8 افراد سوار تھے جنہوں نے پولیس پر گاڑیاں چڑھا دیں، گاڑیاں بیریئر کو جا لگیں جس سے بیریئر ٹوٹ گئے اور مسلح افراد نے پولیس پر حملہ کر دیا۔

کریڈٹ: انڈیپنڈنٹ نیوز پاکستان-آئی این پی