سپریم کورٹ نے راو انوار کی ایگزٹ کنٹرول لسٹ ( ای سی ایل)سے نام نکالنے کی درخواست پر وزارت داخلہ کو نوٹس جاری کر دیا۔ جسٹس اعجازالاحسن کی سربراہی میں سپریم کورٹ کے 3 رکنی بنچ نے راوانوار کی ای سی ایل سے نام نکالنے کی درخواست کی سماعت کی۔ را وانوار کے وکیل نے عدالت میں موقف اختیار کیا کہ جس کیس میں نام ای سی ایل میں ڈالا گیا وہ ختم ہو چکا ہے اس لیے ان کا نام اب ای سی ایل میں رہنے کا کوئی جواز نہیں، را وانوار کسی اور کیس میں مطلوب بھی نہیں۔ عدالت نے درخواست پر مختصر سماعت کے بعد وزارت داخلہ سمیت دیگر فریقین کو نوٹس جاری کرتے ہوئے سماعت غیر معینہ مدت کے لیے ملتوی کر دی۔ واضح رہے کہ را وانوار کا نام نقیب اللہ محسود قتل کیس میں ای سی ایل میں ڈالا گیا تھا، ٹرائل کورٹ سے بری ہونے کے بعد راو انوار نے ای سی ایل سے نام نکالنے کے لیے سپریم کورٹ سے رجوع کیا تھا۔

کریڈٹ: انڈیپنڈنٹ نیوز پاکستان-آئی این پی