پشاور سمیت خیبر پختونخوامیں محرم الحرام کے حوالے سے ریسکیو1122نے تمام تیاریاں مکمل کر لی ہیں ۔ ڈائریکٹر جنرل ریسکیو1122خیبر پختونخوا ڈاکٹر خطیر احمد کے مطابق اس ضمن میں ریسکیواہلکاروں کی چھٹیاں منسوخ کر دی گئیں ہیں ، محرم الحرام کے دوران صوبے بھر میں 3 ہزار سے زائد ریسکیو اہلکار تعینات کیے گئے ہیں۔ انہوں نے کہا کہ 78 ایمبولینسز، 20 فائر ویکلز مختلف امام بارگاہوں کے پاس تعینات کی جائیں گی جبکہ 300 سے زائد ایمبولینسز و دیگر آپریشنل گاڑیوں اور اہلکاروں کو بیک اپ سپورٹ کے لیے الرٹ رکھا جائے گا۔ ڈائریکٹر جنرل ریسکیو1122کے پی کا کہنا ہے کہ پشاور میں میڈیکل ریسپانس یونٹ (بس) صدر اور کوہاٹی میں موجود رہے گی، ریسکیو 1122 کی جانب سے ماتمی جلوسوں کے ساتھ ریسکیو اہلکار موجود رہیں گے، مختلف مقامات پر میڈیکل کیمپس قائم کیے جائیں گے جبکہ عزاداروں کو موقع پر طبی امداد فراہم کی جائے گی جس سے ہسپتالوں پر بوجھ کم پڑے گا۔ انہوں نے کہا کہ ریسکیو1122 نے محرم الحرام کے دوران اضافی ادویات اور دیگر ضروری سامان متعلقہ اضلاع کو فراہم کیا ہے،ریسکیو1122 عزاداروں کے ساتھ ساتھ عوام الناس کو بھی خدمات فراہم کرتا رہے گا، کسی بھی ایمرجنسی کے دوران کنٹرول روم سے براہ راست رابطہ کیا جاسکتا ہے۔

کریڈٹ: انڈیپنڈنٹ نیوز پاکستان-آئی این پی