پاکستان نے جولائی میں چین پاکستان اقتصادی راہداری ( سی پیک ) کی دسویں سالگرہ منانے کی تیاریاں شروع کر دیں ، دونوں ممالک سی پیک میں ہونے والی دس سالہ پیش رفت کا جشن منائیں گے۔ گوادر پرو کے مطابق وفاقی وزیر برائے منصوبہ بندی ترقی اور خصوصی اقدامات احسن اقبال نے سی پیک منصوبوں پر ہونے والی پیش رفت کا جائزہ لینے کے لیے ایک اجلاس کی صدارت کی اور سی پیک کے نتیجے میں پاکستان کے پسماندہ علاقوں میں نمایاں اقتصادی پیش رفت کا جشن منانے کی ہدایات جاری کیں۔ گوادر پرو کے مطابق احسن اقبال نے تمام وزارتوں اور ڈویژنوں کو یہ بھی ہدایت کی کہ وہ جولائی میں منعقد ہونے والی آئندہ مشترکہ رابطہ کمیٹی (جے سی سی) میں پیش کیے جانے والے ترقیاتی منصوبوں کی تجاویز پیش کریں۔ گوادر پرو کے مطابق ہر وزارت سے کہا گیا کہ وہ اپنے منصوبے کے بارے میں رپورٹس جمع کرائے، جس میں پاکستان کو ملنے والے معاشی اور سماجی فوائد پر زور دیا گیا اور سی پیک کے خلاف منفی پروپیگنڈے کو مسترد کر دیا۔

گوادر پرو کے مطابق اجلاس میں مختلف وزارتوں، ڈویژنوں، چین میں پاکستانی سفارت خانے، پاکستان میں چینی سفارتخانے کی نمائندگی کرنے والے متعدد سرکاری حکام اور اسٹیک ہولڈرز نے شرکت کی اور انہیں سی پیک منصوبوں میں ہونے والی نمایاں پیش رفت ،خاص طور پر اکتوبر 2022 میں ہونے والے 11ویں جے سی سی اجلاس کے بعد اور وزیراعظم شہباز شریف کے دورہ چین سے ہونے والی پیشرفت سے آگاہ کیا گیا ۔ گوادر پرو کے مطابق وزیر نے متعلقہ اسٹیک ہولڈرز کو ہدایت کی کہ وہ پروجیکٹوں کی بروقت تکمیل کو یقینی بنانے کے لیے مشترکہ ورکنگ گروپس (JWGs) کی باقاعدہ میٹنگیں منعقد کریں۔ گوادر پرو کے مطابق وزیر نے وزارتوں کو خصوصی اقتصادی زونز (SEZs) پر کام تیز کرنے کی بھی ہدایت کی تاکہ کم لاگت کی پیداوار کے ساتھ چینی صنعتی نقل مکانی کو پاکستان میں راغب کیا جا سکے اور آئندہ جے سی سی کے لیے ٹھوس ایجنڈوں کے ساتھ تجاویز کو حتمی شکل دیں جس میں دونوں ممالک سی پیک میں ہونے والی دس سالہ پیش رفت کا جشن منائیں گے۔

کریڈٹ: انڈیپنڈنٹ نیوز پاکستان-آئی این پی