وائلڈ لائف سفاری پارک میں گزشتہ چند ہفتوں کے دوران شیر کے 7 بچوں کی پیدائش ہوئی ۔رائیونڈ روڈ پر واقع لاہور سفاری پارک میں تین مادہ شیرنیوں نے سات بچوں کو جنم دیا ہے، ایک کے ہاں تین جبکہ باقی دو نے دو، دو بچوں کو جنم دیا، ان نئے مہمانوں میں دو بچے سفید ہیں جبکہ اس سے قبل رائل بنگال ٹائیگر کے تین بچوں کی بھی صحت مند بریڈ لی گئی تھی۔لاہور سفاری زو کے ڈائریکٹر تنویر احمد جنجوعہ نے بتایا کہ تمام بچے صحت مند ہیں۔ ادھر سفاری زو سے ملنے والی تفصیلات کے مطابق چار بچوں کو پیدائش کے بعد ان کی ماں نے انہیں قبول نہیں کیا جس کی وجہ سے ان کی ہینڈ فیڈنگ کی جارہی ہے جبکہ باقی بچے اپنی ماں کے ساتھ اٹھکیلیاں کرتے نظر آتے ہیں۔سفاری زو حکام کے مطابق شیر کے بچوں کی پیدائش سے قبل رائل بنگال ٹائیگر کے بھی تین بچوں کی پیدائش ہوئی جن کی عمر اب چند ہفتے ہوچکی ہے, نئے مہمانوں میں تین نر اور چار مادہ ہیں، لاہور سفاری پارک میں شیروں کی آبادی 22 سے بڑھ کر 29 ہوگئی ہے۔ویٹرنری ماہرین کے مطابق بگ کیٹس کا یہ رویہ ہے کہ اگر انہیں اپنے نوزائیدہ بچوں میں کوئی نقص محسوس ہو تو مادہ انہیں قبول نہیں کرتی اور انہیں دودھ نہیں پلاتی اس وجہ سے پھر ان بچوں کو مصنوعی دودھ پلایا جاتا ہے۔

کریڈٹ: انڈیپنڈنٹ نیوز پاکستان-آئی این پی