لاہور ہائیکورٹ نے سڑکوں اور موٹرویز کی بندش کیخلاف درخواست غیر مثر قرار دیتے ہوئے نمٹا دی۔لاہور ہائیکورٹ کے جسٹس فاروق حیدر نے اعجاز خان ایڈووکیٹ کی درخواست پر سماعت کی، درخواست میں وفاق اور حکومت پنجاب سمیت دیگر کو فریق بنایا گیا ہے۔درخواست میں موقف اختیار کیا گیا کہ بانی پی ٹی آئی نے 24 نومبر کیلئے پرامن احتجاج کی کال دی، شہریوں کی احتجاج میں شرکت روکنے کیلئے حکومت نے سڑکیں بند کردیں، سڑکیں اور موٹر ویز بند ہونے سے شہریوں کو مشکلات کا سامنا ہے۔درخواست میں مزید کہا گیا کہ سڑکوں کی بندش سے سکول، ادارے اور بسیں بند ہو گئیں، سڑکوں اور موٹر ویز کی بندش سے ناقابل تلافی نقصان ہو رہا ہے، عدالت حکومت کو سڑکیں اور موٹرویز کھولنے کا حکم دے۔دوران سماعت ایڈیشنل اٹارنی جنرل نے درخواست کی مخالفت کرتے ہوئے عدالت کو بتایا کہ اس وقت کوئی سڑک اور موٹروے بند نہیں ہے۔بعدازاں عدالت عالیہ نے سڑکوں اور موٹر ویز کی بندش کے خلاف درخواست غیر موثر قرار دیتے ہوئے نمٹا دی۔

کریڈٹ: انڈیپنڈنٹ نیوز پاکستان-آئی این پی