وزیر اعلی خیبر پختونخوا علی امین گنڈاپور نے کہا ہے کہ ضلع کرم میں پائیدار امن پر کوئی سمجھوتہ نہیں ہوگا، 121 سال پرانے تنازع کے مستقل حل کے لیے کوششیں جاری ہیں۔ پشاور میں میڈیا سے گفتگو کرتے ہوئے علی امین گنڈاپور نے کہا کہ کرم کے 121 سال پرانے تنازع کے مستقل حل کے لیے کوششیں جاری ہیں، جرگے کے فیصلے کے مطابق بنکرز گرانے کا عمل بھی جاری ہے۔وزیراعلی نے کہا کرم میں پائیدار امن پر کوئی سمجھوتہ نہیں ہوگا اور امن دشمنوں سے قانون کے مطابق نمٹا جائے گا۔ دوسری جانب ممبر کرم جرگہ ارشاد حسین بنگش نے نجی ٹی وی سے گفتگو کرتے ہوئے کہا کہ کرم میں بنکرز گرائے جا رہے ہیں، دونوں فریقین نے اسلحہ جمع کرانے کا لائحہ عمل دیا ہوا ہے۔انہوں نے کہا کہ6 لاکھ آبادی کے لیے بھیجے جانے والے امدادی ٹرک ناکافی ہیں جبکہ علاقے میں پیٹرول کا مسئلہ ہے، تعلیمی ادارے بند ہیں اور مریضوں کو مسائل ہیں۔ارشاد بنگش کا کہنا تھا کہ حکومت اپنی رٹ قائم کرے اور فوری ٹل پاراچنار روڈ کھولے، راستوں کی بندش سے طلبہ اور بیرون ملک جانے والوں کو مشکلات ہیں جبکہ دونوں فریقین روڈ جلد از جلد کھلنے پر متفق ہیں۔

کریڈٹ: انڈیپنڈنٹ نیوز پاکستان-آئی این پی