مشیر اطلاعات خیبرپختونخوا بیرسٹر سیف نے کہا ہے کہ کرم میں نئی پولیس چیک پوسٹیں بنانے سمیت 2 ایف سی پلاٹونز بھی تعینات کی جائیں گی، متاثرین کو معاوضے دینے کا عمل جلد شروع ہوجائیگا۔اپنے ایک بیان میں بیرسٹر محمد علی سیف نے کہا کہ ایک صدی سے زیادہ عرصے کے کرم تنازع کے پائیدار حل میں کامیاب ہوئے، کرم مسئلے کے حل کیلئے جرگے کی تقریبا 50 سے زیادہ نشستیں ہوئیں، جرگہ اراکین نے خلوص کے ساتھ کوششیں کیں جبکہ کمشنر اور ڈی آئی جی سمیت پوری انتظامیہ نے بھی بھرپور کردار ادا کیا۔مشیر اطلاعات کے پی نے کہا کہ سڑک کی بندش کا مقصد مزید خونریزی کا راستہ روکنا تھا، سڑک کی بندش کے باعث حکومت کو مسائل کا پوری طرح ادراک تھا، وزیراعلی نے ادویات اور دیگر سروسز کے لیے اپنا ہیلی کاپٹر وقف کیا جس کے ذریعے تقریبا 15 ٹن ادویات پہنچائی گئیں اور 700 سے زائد افراد کو ہیلی کاپٹر کے ذریعے فضائی سروس فراہم کی گئی۔ بیرسٹر سیف نے کہا کہ دھرنا دینے والوں کے مطالبات تسلیم ہوئے، امن معاہدے کے بعد دھرنوں کا اب کوئی جواز نہیں رہا، متاثرین کو معاوضے دینے کا عمل جلد شروع ہو جائیگا۔ انہوں نے کہا کہ کرم شاہراہ کو محفوظ بنانے کے لیے 400 پولیس اہلکاروں کو بھرتی کرنیکی منظوری دی گئی ہے، نئی پولیس چیک پوسٹوں سمیت 2 ایف سی پلاٹون بھی تعینات کیے جائیں گے۔ واضح رہے کہ گزشتہ روز کرم کی صورتحال پر جاری گرینڈ جرگے میں فریقین نے امن معاہدے پر دستخط کر دیے تھے جس کے تحت نقصانات کا ازالہ کیا جائیگا اور بڑا اسلحہ حکومتی تحویل میں دیا جائیگا جبکہ فریقین کی جانب سے بنائیگئے مورچے ختم کیے جائیں گے اور قبائلی تصادم کو مذہبی رنگ نہیں دیا جائے گا۔

کریڈٹ : انڈیپنڈنٹ نیوز پاکستان-آئی این پی