کراچی کے علاقے ابوالحسن اصفہانی روڈ پر مرغیوں کے تاجر کو قتل کردیا گیا، ملزمان رقم چھینے بغیر فرار ہوئے۔ قتل ذاتی دشمنی کا شاخسانہ بتایا جات ہے۔اس حوالے سے پولیس حکام کا کہنا ہے کہ مقتول مرغیوں کا بیوپاری تھا، رقم وصول کرنے علاقے میں آیا تھا، مقتول کی شناخت 38سالہ اللہ یار کے نام سے ہوئی ہے۔پولیس کے مطابق واقعہ ذاتی دشمنی کا لگتا ہے کیونکہ مقتول اللہ یار کے ساتھ اس کا سیکیورٹی گارڈ بھی موجود تھا، تاہم سیکیورٹی گارڈ اور اس کا اسلحہ بھی محفوظ ہے۔ چار نامعلوم مسلح افراد نے اللہ یار کی گاڑی پر فائرنگ کی جس سے وہ موقع پر ہی جاں بحق ہوگیا، ملزمان موقع سے باآسانی فرار ہونے میں کامیاب ہوگئے۔پولیس کا کہنا ہے کہ ملزمان نے مقتول سے گاڑی میں موجود نقد رقم بھی نہیں چھینی، واقعے کا مقدمہ درج کرکے مزید تحقیقات شروع کردی گئی ہیں۔ واضح رہے کہ اس سے قبل گزشتہ ماہ اکتوبر کو کراچی کے علاقے نارتھ ناظم آباد میں آٹو پارٹس کے شعبے سے وابستہ تاجر آصف کو نامعلوم افراد نے فائرنگ کرکے قتل کردیا تھا۔ مقتول اپنی جان بچانے کیلئے شدید زخمی حالت میں خود گاڑی چلا کر سڑک پر پہنچا اور مدد کیلیے لوگوں کو پکارتا رہا۔

کریڈٹ : انڈیپنڈنٹ نیوز پاکستان-آئی این پی