شہر قائد میں ہفتے کے روز پارہ مزید گر گیا جب کہ ملک بھر میں آج(اتوار ) سے سردی کی شدت بڑھنے کا امکان ہے۔محکمہ موسمیات کے مطابق کراچی کا کم سے کم درجہ حرارت گزشتہ روز کے مقابلے میں 2.5 ڈگری تک گر گیا اور 14 ڈگری سینٹی گریڈ تک ریکارڈ کیا گیا۔ اتوار سے صوبہ سندھ میں ہلکی شدت کی نئی سردی کی لہر داخل ہوگی۔ قبل ازیں محکمہ موسمیات کی جانب سے پیش گوئی کی جاچ کی ہے کہ کراچی میں اتوار کو پارہ 11 ڈگری سینٹی گریڈ ریکارڈ ہوسکتا ہے۔دریں اثنا ملک کے بیشتر علاقوں میں 8 دسمبر سے بارش اور برفباری کا امکان ہے جس کے سبب سردی کی شدت میں اضافہ ہو سکتا ہے۔ محکمہ موسمیات نے سردی کی شدت میں اضافے، بارش اور برفباری کی ایڈوائزری جاری کر دی جس کے مطابق ملک کے بالائی علاقوں میں مغربی ہوائوں کا سلسلہ داخل ہو گیا جس کے سبب 8 سے 14 دسمبر کے دوران درجہ حرارت میں نمایاں کمی واقع ہوگی۔ ملک کے میدانی علاقوں میں اتوار سے کہر پڑنے اور پنجاب سمیت بلوچستان میں سرد ہوائیں چلنے کا امکان ہے۔چترال، مالاکنڈ، مانسہرہ، دیر، ایبٹ آباد، ہنزہ، اسکردو اور نیلم سمیت مختلف علاقوں میں بارش اور پہاڑوں پر برفباری کی بھی توقع ہے۔اسی طرح مری، گلیات، اٹک، چکوال، گجرانوالہ، لاہور سرگودھا اور خوشاب میں بارش کا امکان ہے۔ ایڈوائزری میں کہا گیا ہے کہ شہری شدید سردی میں باہر نکلنے اور بے جا سفر سے اجتناب کریں۔

کریڈٹ : انڈیپنڈنٹ نیوز پاکستان-آئی این پی