وفاقی وزیر داخلہ محسن نقوی نے کہا ہے کہ خیبرپختونخوا میں امن کی آبیاری کے لئے آخری حد تک جائیں گے، کرم کے معاملے پر کسی بھی سیاسی جماعت یا گروپ کو سیاست نہیں کرنی چاہیے، یہ بہت حساس معاملہ ہے۔تفصیل کے مطابق وفاقی وزیر داخلہ محسن نقوی گزشتہ روز چیئرمین قومی وطن پارٹی آفتاب احمد خان شیرپائو کی رہائشگاہ پہنچے، آفتاب شیر پا ئونے وزیر داخلہ کا خیر مقدم کیا۔ دونوں رہنمائوں کی ملاقات میں باہمی دلچسپی و سیاسی امور اور ملک کی مجموعی صورتحال پر تبادلہ خیال کیا گیا جبکہ خیبرپختونخوا میں امن و امان کی صورتحال پر بھی بات چیت کی گئی۔وفاقی وزیر داخلہ محسن نقوی نے آفتاب احمد شیرپائو کو خیبرپختونخوا خصوصا کرم میں پائیدار امن کے لئے کئے گئے اقدامات سے بھی آگاہ کیا۔ وزیر دخلہ نے کہا کہ آفتاب خان شیر پائو بزرگ سیاستدان ہیں، خیبرپختونخوا میں انکی سیاسی خدمات کا ہر کوئی معترف ہے۔محسن نقوی نے کہا ہے کہ ایپکس کمیٹی کے اجلاس میں کے پی کے خصوصا کرم میں قیام امن کیلئے اہم فیصلے کئے گئے، خیبرپختونخوا میں امن کی آبیاری کے لئے آخری حد تک جائیں گے۔وفاقی وزیر داخلہ نے مزید کہا کہ کرم ایجنسی ایشو پر کسی کو سیاست نہیں کرنی چاہیے، یہ بہت حساس معاملہ ہے۔ قومی وطن پارٹی کے صوبائی صدر سکندر شیر پا ئوبھی اس موقع پر موجود تھے۔

کریڈٹ : انڈیپنڈنٹ نیوز پاکستان-آئی این پی