ضلع ڈیرہ اسماعیل خان میں اپنے والد کی وفات پر لوگوں سے ملاقات کرنے کے دوران ایک سینئر فوجی افسر کو ان کے دو بھائیوں سمیت مشتبہ دہشتگردوں نے اغوا کرلیا جبکہ پولیس نے واقعے کی تصدیق کردی ہے۔ تفصیل کے مطابق آرمی افسر اور ان کے دو بھائی جو کہ راولپنڈی کے کنٹونمنٹ بورڈ ہیڈ آفس کے حاضر سروس افسر اور نیشنل ڈیٹا بیس اور رجسٹریشن اتھارٹی (نادرا)کے ملازم ہیں، تینوں ڈیرہ اسماعیل خان کی تحصیل کولاچی کے محلے خادر خیل کی مسجد میں موجود تھے جہاں شہری ان کے والد کے انتقال پر تعزیت کے لیے آرہے تھے کہ اسی دوران اسلحے کے زور پر مشتبہ عسکریت پسندوں نے انہیں اغوا کیا۔تینوں افسران والد کی نماز جنازہ میں شرکت کے لیے آبائی علاقے پہنچے تھے جو کہ 27 اگست کو ادا کی گئی تھی۔کولاچی پولیس نے واقعے کی تصدیق کی تاہم اعلی پولیس حکام نے واقعے کی تصدیق یا تردید نہیں کی ہے۔

کریڈٹ: انڈیپنڈنٹ نیوز پاکستان-آئی این پی