وزیر دفاع خواجہ آصف نے کہا ہے کہ میری اوقات نہیں کہ مذاکرات ناکام یا کامیاب بنائوں، مجھے پی ٹی آئی والوں کی نیتوں پر 100 فیصد شک ہے۔ایک انٹرویو میں خواجہ آصف نے کہا کہ پی ٹی آئی والے وقت گزار رہے ہیں ان کے مقاصد کچھ اور ہیں، وہ عمران خان کو مذاکرات کے ذریعے باہر لانے میں سنجیدہ نہیں، مجھے ان کی نیتوں پر شک ہے۔انہوں نے کہا کہ بہت سے لوگوں کے ہاتھ میں گیم آگئی ہے، مجھے ایسے ہی ٹارگٹ کررہے ہیں کہ مذاکرات ناکام ہوں، میری دعا ہے اگر دو نمبری ہو رہی ہے تو بھی مذاکرات کامیاب ہوں، ایک بھی نکتہ ایسا نہیں کہ مذاکرات کامیابی کی طرف جائیں۔خواجہ آصف کا کہنا تھا کہ پی ٹی آئی کا مقصد کامیابی نہیں بلکہ وہ بندہ ڈھونڈ رہے ہیں جس پر ناکامی کا ملبہ ڈالا جائے، یہ وقت ضائع کر رہے ہیں لیکن مقاصد کچھ اور ہیں، یہ مذاق رات ہیں، مذاکرات نہیں۔انہوں نے مزید کہا کہ میاں صاحب سمیت پارٹی لیڈرشپ مذاکرات کے حق میں ہے، رانا ثنا اللہ اور دیگر ساتھی مذاکرات کے حق میں ہیں، میں بھی مذاکرات کے حق میں ہوں لیکن یہ نہیں ہیں۔

کریڈٹ : انڈیپنڈنٹ نیوز پاکستان-آئی این پی