پی ٹی آئی رہنما اور اپوزیشن لیڈر عمر ایوب نے کہا ہے کہ حکومت ہمارے ساتھ مذاکرات میں دلچسپی نہیں رکھتی، ہم کسی سے ڈرنے والے نہیں ، مذاکرات کرنے ہیں تو کریں، نہیں تو نہ کریں۔پشاور ہائیکورٹ کے باہر میڈیا سے گفتگو کرتے ہوئے عمر ایوب کا کہنا تھا کہ مذکراتی کمیٹی بانی پی ٹی آئی عمران خان نے تشکیل دی ہوئی ہے۔انہوں نے کہا لگتا ہے حکومت کو مذاکرات میں کوئی دلچسپی نہیں ہے۔ ہم کسی سے ڈرنے والے نہیں ہیں۔ اور نہ ہم نے کسی کے پاس جانا ہے۔ اگر کسی نے مذکرات کرنے ہیں تو کریں نہیں تو نہ کریں۔انہوں نے کہا کہ پشاور ہائیکورٹ نے میرے تمام مقدمات کی تفصیل مانگی ہے، القادر ٹرسٹ کیس میں بانی پی ٹی آئی عمران خان اور بشری بی بی کی دیر تک سماعت ہوئی، عدالت کا وقت تین بجے تک ہوتا ہے ، اتنی دیر تک سماعت کیسے جاری رہی؟۔اپوزیشن لیڈر قومی اسمبلی کا مزید کہنا تھا کہ پی ٹی آئی کے قیدیوں کو سہولیات نہیں مل رہیں، پی ٹی آئی کے کارکنان کو گنجائش سے زیادہ جیلوں میں رکھا ہوا ہے، ہم کسی صورت پیچھے نہیں ہٹیں گے۔

کریڈٹ : انڈیپنڈنٹ نیوز پاکستان-آئی این پی