قائد ملت جعفریہ پاکستان علامہ سید ساجد علی نقوی نے نویں امام حضرت محمد تقی الجواد کے یوم ولادت باسعادت (10 رجب المرجب 195 ھ ) کے موقع پر کہا ہے کہ آپ کو اپنے اجداد اور آئمہ اطہار کے مشن اور تعلیمات کو اگرچہ مختصر عرصے کے لیے آگے بڑھانے کا موقع ملالیکن یہ مختصر عرصہ بھی تاریخ میں انمٹ نقوش رقم کر گیا اور ہر قسم کے سنگین حالات میں فریضہ امامت انتہائی ذمہ داری، حکمت عملی اور بصیرت کے ساتھ انجام دیا جس کے طفیل آج دنیا امامت کے فیوض و برکات سے گذشتہ کئی صدیوں سے فیض یاب ہورہی ہے۔علامہ ساجد نقوی نے کہا کہ حضرت امام محمد تقی نے جہاں امت مسلمہ کو قرآن کی تعلیمات ، رسول اکرم ۖ کی سیرت طیبہ اور آئمہ اطہار کے فرامین کی طرف متوجہ رکھا وہاں ہر میدان اور ہر مرحلے میں امت کی رہنمائی فرمائی آپ اخلاق واوصاف میں انسانیت کی اس بلندی پر تھے رسولۖ اور آل رسولۖ کا طرہ امتیاز تھی کہ جس کے سامنے ہر ایک نے سر تسلیم خم کیا۔

ضرورت مندوں کی حاجت روائی کرنا مساوات اور سادگی کو ہر حالت میں پیش نظر رکھنا، غربا ء کی پوشیدہ طور پر خبر گیری اور دوستوں کے علاوہ دشمنوں تک سے اچھا سلوک ، مہمانوں کی خاطر مدارت، انہماک اور علمی اور مذہبی پیاسوں کے لیے فیصلہ کے چشموں کا جاری رکھنا آپ کی سیرت اور زندگی کا نمایاں پہلو تھا۔آپ کے والد گرامی امام رضا فرماتے '' عنقریب میرا رب مجھے ایک ایسے فرزند سے نوازے گا جو میرا وارث ہوگا اورحق و باطل کے درمیان امتیاز قائم کرنے والا ہو گا(اصول کافی)''۔ علامہ ساجد نقوی نے کہا کہ امام محمد تقی نے امت مسلمہ کو تا قیامت رہبری و رہنمائی فراہم کرنے کے لیے جس انداز سے حکمت عملی ترتیب دی اور جس طرح حکمرانوں اور مخالف طبقات کی سازشوں کا مقابلہ فرمایا اس کی مثال نہیں ملتی ۔امام کا فرمان ''بہترین اور بافضیلت عبادت وہ ہے جو اخلاص کے ساتھ انجام دی جائے'' ہر دور میں مشعل راہ ہے۔ قائد ملت جعفریہ پاکستان نے امت مسلمہ پر زور دیا کہ وہ حضرت امام محمد تقی کی سیرت کا مطالعہ کرکے اس پر حقیقی معنوں میں عمل پیرا ہونے کی جدوجہد کریں تاکہ قیامت تک مکمل استقامت اور واضح اور روشن راستے کے ذریعے عمل کیا جا سکے اور آخرت کی فلاح حاصل کی جا سکے۔

کریڈٹ : انڈیپنڈنٹ نیوز پاکستان-آئی این پی