گورنر سندھ کامران ٹیسوری نے ملک میں سرمایہ کاری میں اضافے پر گورنرز کانفرنس بلانے کا اعلان کردیا ۔ انہوں نے یہ اعلان گورنر ہائوس کراچی میں گورنر پنجاب سلیم حیدر اور گورنر خیبر پختونخوا فیصل کریم کنڈی سے ملاقات میں کیا ۔ملاقات میں ملکی صورتِ حال، مدارس رجسٹریشن، پاراچنار کے مسائل اور ان کے حل پر تفصیلی تبادلہ خیال کیا گیا۔ ملاقات میں تینوں گورنروں نے پارا چنار کے مسائل کے حل کیلئے تمام وسائل بروئے کار لانے کے عزم کا اعائدہ کیا۔اس موقع پر گورنر سندھ کامران ٹیسوری نے سات جنوری2025 کو گورنرز کانفرنس بلانے کا اعلان کیا جس کی میزبانی وہ خود کریں گے۔گورنرز کانفرنس میں اندرونی و بیرونی سرمایہ کاری میں اضافے اور ملک کی ترقی و خوش حالی پر تفصیلی گفتگو ہوگی۔وزیراعلی سندھ مراد علی شاہ سے بھی گورنر پنجاب اور گورنر کے پی کی ملاقات ہوئی جس میں ملک کی سیاسی اور معاشی صورت حال پر تبادلہ خیال کیا گیا۔

کریڈٹ : انڈیپنڈنٹ نیوز پاکستان-آئی این پی