بلوچستان عوامی پارٹی کے مرکزی سیکریٹری اطلاعات سینیٹر کہدہ بابر نے کہا ہے کہ گوادر ہمارا تھا، ہمارا رہے گا،گوادر کسی ایک فرد کی جاگیر نہیں۔ وفاقی وزیر ریلوے حنیف عباسی کی میڈیا سے گفتگو پر رد عمل دیتے ہوئے سینیٹر کہدہ بابر نے سوشل میڈیا پلیٹ فارم ایکس پر جاری پیغام میں لکھا کہ گوادر ہمارا تھا، ہمارا رہے گا۔سینیٹر کہدہ بابر بلوچ کا کہنا تھا کہ یہ درست ہے کہ پاکستان نے گوادر کو عمان سے خریدا، لیکن اس کر ہرگز یہ مطلب نہیں کہ گوادر کے عوام کا اپنے وسائل اور زمین پر حق نہیں۔انہوں نے کہا کہ گوادر محض ایک خریدا گیا علاقہ نہیں، یہاں کے باسیوں کی پہچان، تاریخ نسلوں سے اس زمین سے جڑی ہوئی ہے۔ سینیٹر کہدہ بابر بلوچ نے مطالبہ کرتے ہوئے کہا کہ عمان کے ساتھ گوادر کی خریداری کے معاہدے کو منظر عام پر لایا جائے، قوم کو معلوم ہونا چاہیے گوادر کو کن شرائط پر خریدا گیا۔کہدہ بابر کا کہنا تھا کہ یہ بھی معلوم ہونا چاہیے معاہدے میں مقامی افراد کے حقوق کا کیا ذکر ہے، گوادر کسی ایک فرد کی جاگیر نہیں، اپنے وسائل، ترقی اور فیصلوں میں برابر کی شراکت مقامی افراد کا بنیادی حق ہے۔ وفاقی وزیرِ ریلوے حنیف عباسی نے اپنے ایک بیان میں کہا تھا کہ گوادر پورٹ پاکستان کا ہے، کسی کے باپ دادا کا نہیں ہے۔

کریڈٹ: انڈیپنڈنٹ نیوز پاکستان-آئی این پی