نیب نے گندم خریداری میں مبینہ کرپشن پر محکمہ خوراک سندھ کے افسران کو طلب کرلیا۔نیب کی جانب سے جاری نوٹیفکیشن میں سابق سیکرٹری سندھ محکمہ خوراک خرم شہزاد عمر، سابق ڈائریکٹرمحکمہ خوراک امداد شاہ اور مختلف اضلاع میں تعینات ڈی ایف سیز کو 21 مارچ کو سکھر نیب آفس طلب کیا گیا ہے۔ان افسران پر گندم خریداری کی مد میں مبینہ کرپشن کرنے اورگندم غائب کرنیکا الزام ہے۔ اس کے علاوہ میرپور خاص ،لاڑکانہ ، سکھر،حیدرآباد اور شہید بینظیرآباد ڈویژن سے خریدی گئی گندم کا ریکارڈ بھی طلب کیا گیا ہے۔محکمہ خوراک سے سال 23-22-2021 اور 24 میں خریدی گئی گندم کا ریکارڈ مانگا گیا ہے اور موجودہ ذخیرہ گندم کا ریکارڈ بھی طلب کیا گیا ہے۔ واضح رہے کہ محکمہ خوراک سندھ نے سود پر بینکوں سے قرضہ لے کر اربوں روپے کی گندم خریدی تھی اور گندم خریداری پر پہلے ہی 80 ارب روپے کے نقصان ہونے کا انکشاف ہوا ہے۔ 80 ارب روپے کے نقصان کا انکشاف محکمہ خزانہ کی جانب سے سندھ حکومت کو بھیجی گئی سمری میں کیا گیا تھا۔

کریڈٹ: انڈیپنڈنٹ نیوز پاکستان-آئی این پی