پی ٹی آئی کے رہنما اور سابق اسپیکر قومی اسمبلی اسد قیصر نے بھارت کی جانب سے سندھ طاس معاہدہ معطل کرنے کو اعلان جنگ قرار دیتے ہوئے کہا ہے کہ بھارت کا یہ فیصلہ کسی صورت قابل قبول نہیں، حکومت سنجیدہ ہے تو بانی پی ٹی آئی سے بھی بات کرے اور جیل سے باہر نکال کر یکجہتی پیدا کی جائے۔ نجی ٹی وی سے گفتگو کرتے ہوئے پی ٹی آئی رہنما اسد قیصر نے پاکستان کے خلاف یکطرفہ بھارتی اقدامات پر سخت ردعمل کا اظہار کرتے ہوئے کہا ہے کہ حکومت کو موثرانداز میں یہ معاملہ عالمی فورم پر اٹھانا چاہیے۔پی ٹی آئی رہنما کا کہنا تھا کہ بھارت یہ کر نہیں سکتا، سندھ طاس معاہدہ بین الاقوامی معاہدہ ہے، عالمی بینک اس معاہدے کا ضامن ہے، پورا ایک طریقہ کار ہوتا ہے۔سابق اسپیکر قومی اسمبلی کا کہنا تھا کہ حکومت کا موثر انداز میں یہ معاملہ عالمی فورم پر اٹھانا چاہیے، بھارتی اقدام تو اعلان جنگ ہے اور وہ ہماری زمینیں بنجر کرنا چاہتا ہے۔اسد قیصر کا کہنا تھا کہ بھارت کا یہ فیصلہ کسی صورت قابل قبول نہیں۔انہوں نے کہا کہ پاکستان ہمارا ملک ہمارا ہے ہم کسی طور اس کو جھکنے نہیں دیں گے، پاکستان کے دفاع کیلئے ہم ہر حد تک جائیں گے۔انہوں نے کہا کہ اگر حکومت سنجیدہ ہے تو بانی پی ٹی آئی سے بھی بات کرے اور انہیں جیل سے باہر نکال کر یکجہتی پیدا کی جائے۔

کریڈٹ: انڈیپنڈنٹ نیوز پاکستان-آئی این پی