قومی اسمبلی میں پی ٹی آئی کی پارلیمانی لیڈر زرتاج گل نے کہا ہے کہ بانی پی ٹی آئی نے کہا مذاکرات ختم تو مذاکرات ختم ، جو یونیورسٹی بنائی گئی اس کا 190 ملین پائونڈ سے کوئی تعلق ہی نہیں، وزیراعظم شہباز شریف اور ان کی کابینہ اس بند لفافے کو اب ڈی کلاسیفائی کردیں۔ ایک انٹرویو میں زرتاج گل نے کہا کہ ان کی پارٹی نے بڑے پن کا مظاہرہ کرتے ہوئے مذاکرات شروع کیے تھے لیکن حکومت نے جوڈیشل کمیشن نہیں بنایا۔ ہمارے 14 لوگ شہید ہوگئے اس کے باوجود مذاکراتی کمیٹی بنائی، حکومتی وزیر سمجھتے ہیں مذاکرات پی ٹی آئی کی کمزوری ہے، ہماری سیاسی میچورٹی تھی ہم نے بڑے پن کا مظاہرہ کیا، بڑی سادہ ڈیمانڈ کی۔ زرتاج گل نے کہا کہ علی امین گنڈاپور واحد وزیراعلی ہیں جو ووٹ کی طاقت سے آئے ہیں، 9 مئی کے متاثر ہیں ہم ہیں اور ن لیگ کی حکومت بینیفیشری ہے، حکومت نے اپنی نالائقی اور کالے کرتوت چھپانے کی کوشش کی، حکومت سیاسی بلوغت دکھاتی اور جوڈیشل کمیشن بنا دیتے۔ کسی اور سیاسی پارٹی پر اتنا مشکل وقت آتا تو وہ جدہ بھاگ چکے ہوتے، بار بار کہا اس چیز کی سزا دے رہے ہیں جس کے بانی پی ٹی آئی بینیفیشری نہیں۔پی ٹی آئی رہنما نے کہا کہ جو یونیورسٹی بنائی گئی اس کا 190 ملین پانڈ سے کوئی تعلق ہی نہیں، وزیراعظم شہباز شریف کی کابینہ اس بند لفافے کو اب ڈی کلاسیفائی کردیں۔

کریڈٹ: انڈیپنڈنٹ نیوز پاکستان-آئی این پی