ملک کے بالائی اور میدانی علاقے سردی کی لپیٹ میں آگئے، کوئٹہ سمیت بلوچستان کے شمالی علاقوں میں درجہ حرارت منفی ہونے کے بعد تالاب، جوہڑ اور سڑکوں پر پڑا پانی بھی جم گیا۔قلات میں درجہ حرارت منفی 7، کوئٹہ میں منفی 6 ڈگری ریکارڈ کیا گیا جبکہ خیبرپختونخوا کے مالم جبہ، چترال اور دیر کے علاوہ مری، راولاکوٹ اور گلگت بلتستان کے کئی اضلاع میں بھی پارا نقطہ انجماد سے نیچے گرگیا۔محکمہ موسمیات کے مطابق اسلام آباد اور پشاور میں کم سے کم درجہ حرارت منفی ایک، لاہور میں چار اور کراچی میں 12 ڈگری ریکارڈ کیا گیا۔محکمہ موسمیات نے لاہور میں 23 دسمبر کو بارش کی پیش گوئی کردی ہے۔ کراچی میں سردی کی شدت میں اضافے کے بعد درجہ حرارت سنگل ڈیجیٹ میں آگیا۔محکمہ موسمیات کے مطابق کراچی کا درجہ حرارت 9.2 ڈگری سینٹی گریڈ ریکارڈ کیا گیا جبکہ 24 گھنٹے کے دوران موسم سرد اور خشک رہنے کا امکان ہے۔محکمہ موسمیات کے حکام کا کہنا ہے کہ ہوا میں نمی کا تناسب 48 فیصد ہے۔

کریڈٹ : انڈیپنڈنٹ نیوز پاکستان-آئی این پی