رہنما پی ٹی آئی فیصل چوہدری نے کہا ہے کہ آرمی چیف کو خط لکھنے کی وجہ یہ ہے کہ پی ٹی آئی مذاکرات میں گئی لیکن حکومت بے اختیار ہے،چیلنج کرتا ہوں اگر حکومت بااختیار ہے تو چوہدری ریاض کے پروڈکشن پر عملدرآمد کراکے دکھائے؟۔ایک انٹرویو میں انہوں نے کہا کہ عمران خان نے اپنے تینوں خطوط میں ان عوامل کا ذکر کیا جن کو بطور سابق وزیراعظم سمجھتے ہیں، آج کے خط میں عمران خان نے کہا کہ میں اپنی جماعت یا پارٹی کیلئے کوئی رعایت نہیں مانگ رہا، وہ پاکستان کو درپیش چیلنجز اور مشکلات کو نمایاں کررہے ہیں، ان مشکلات سے نکلے بغیر پاکستان آگے نہیں بڑھ سکتا، پاکستان میں سیاسی معاشی جمود ہے، میڈیا آزاد نہیں، بنیادی حقوق معطل ہیں۔

انہوں نے کہا عمران خان کہتے کہ فوج دہشتگردی کے خلاف جنگ لڑ رہی ہے، ہمارے بچے شہید ہورہے ہیں، لیکن عوام میں ہم آہنگی کا فقدان نظر آتا ہے۔اکثریتی مینڈیٹ کو چوری کرکے فارم 47کی حکومتیں مسلط کی گئی ہیں، وہ اس کو اہم شاخسانہ سمجھتے ہیں، 26ویں ترمیم اور پیکا ایکٹ لایا گیا۔ انہوں نے کہا کہ آرمی چیف کو خط لکھنے کی وجہ ہے کہ پی ٹی آئی مطالبات لے حکومت کے پاس گئی لیکن مذاکراتی کمیٹی عمران خان سے ملاقات تک نہیں کراسکی، چیلنج کرتا ہوں اگر حکومت بااختیار ہے تو چوہدری ریاض کے پروڈکشن پر عملدرآمد کراکے دکھائے۔اوورسیز پاکستانیوں کو اپیل کی تھی کہ اگر پاکستان میں جمہوریت اور قانون کی بالادستی چاہتے ہیں تو ترسیلات زر نہ بھیجیں۔

کریڈٹ: انڈیپنڈنٹ نیوز پاکستان-آئی این پی