رکن قومی اسمبلی شیر افضل مروت نے کہا ہے کہ علیمہ خان اوربشری بی بی سے کوئی عداوت نہیں، میرے خلاف سازش بانی کے قریب ترین لوگوں نے کی، بانی پی ٹی آئی خود استعفا مانگیں گے تو دے دوں گا، عہدے سے ہٹانے کی کوئی وجہ ہے ہی نہیں۔ صوابی جلسے میں بانی کے حکم پر اسٹیج پر گیا تھا۔ایک نجی ٹی وی سے گفتگو کرتے ہوئے شیر افضل مروت نے کہا ہے کہ اگر ہمارے پاس حل ہوتا تو ہم دہشت گردی پر قابو پا لیتے، 24 سال ہوگئے ہیں،7 لاکھ کی فوج رکھنے کے باوجود بھی ہم دہشت گردی پر قابو نہیں پا سکے ہیں۔انہوں نے کہا کہ بلوچستان میں ٹرین کا واقعہ پیش آیا، کل کو ایسے مزید واقعات رونما ہوسکتے ہیں، لوگوں کو لاپتہ کرنے کا سلسلہ بند ہونا چاہیے، ایسی چیزوں سے کراہت آتی ہے، شہید ہونے والے فوجی افسران اور جوان بھی ہمارے بچے ہیں، ہمیں پاکستان کے ہرعلاقے کے لوگوں کو ان کا حق دینا ہوگا۔انہوں نے کہا کہ میرے حلقے سے پیٹرول اور گیس نکلتا ہے، سالانہ 14ارب سے زائد روپے قومی خزانہ میں جا رہے ہیں، ہمیں کچھ بھی نہیں مل رہا، وسائل پر حق نہ ملنے پر لوگوں میں احساس محرومی ہے۔شیر افضل مروت نے کہا کہ ہمیں ہر علاقے کیعوام کو ان کا حق دینا ہے، مجھے عہدے سے ہٹانے کی کوئی وجہ ہے ہی نہیں، میرے بڑے حساب ان کی طرف نکلتے ہیں، 9 مئی کے بعد ہم نے جلسے کیے، یہ جلسے نہیں کرسکتے تھے۔

انہوں نے کہا کہ تمام ایم این ایز کو بانی کا حکم تھا کہ اسٹیج پر جانا ہے، میں بانی پی ٹی آئی کے حکم پر اسٹیج پر گیا تھا، میرے نام کے نعرے لگے، اس پر انہیں تکلیف ہے، میں نے بڑی تکالیف اٹھائیں، جیلوں میں گیا، میرے گائوں کے گھر کو گرا دیا گیا، خیبر سے سندھ تک ہم نے جلسے کئے۔ان کا کہنا تھا کہ میرے خلاف سازش بانی پی ٹی آئی کے قریب ترین لوگوں نے کی، میری علیمہ خان اور بشری بی بی سے کوئی عداوت نہیں، میں ایک حادثاتی سیاستداں ہوں، پارٹی کے بعض لوگ مجھے پسند نہیں کرتے ہیں۔شیر افضل مروت نے کہا کہ پارٹی میں کلچر ہے کہ مار بھی کھا ئواور تلوے بھی چاٹو، سوشل میڈیا اتنا طاقتور ہوگیا کہ بانی پی ٹی آئی کے کنٹرول میں بھی نہیں، شہباز گل نے عمران خان کے 2 فون چوری کرکے ڈی جی آئی ایس آئی فیض حمید کے حوالے کر دیئے، پتا چلنے پر بانی پی ٹی آئی نے شہباز گل کو پارٹی سے نکال دیا، اس کے بعدعمران خان کبھی اس سے ملا ہی نہیں ہے۔رکن قومی اسمبلی نے کہا کہ بانی پی ٹی آئی نے مورثیت کے خاتمے کا اعلان کیا ہوا ہے، عمران خان نے اپنی فیملی کو کوئی عہدہ نہیں دیا ہوا، بانی پی ٹی آئی کی فیملی کی کسی خاتون نے الیکشن میں حصہ نہیں لیا ہے۔

کریڈٹ: انڈیپنڈنٹ نیوز پاکستان-آئی این پی