اینٹی نارکوٹکس فورس ( اے این ایف ) کا تعلیمی اداروں اور ملک کے مختلف شہروں میں منشیات اسمگلنگ کے خلاف کریک ڈائون جاری ہے۔ ملک میں مختلف کارروائیوں میں 27 لاکھ سے زائد مالیت کی 26 کلو سے زیادہ منشیات برآمد کرکے 2 ملزمان کو گرفتار کرلیا گیا۔ترجمان اے این ایف کے مطابق اٹک میں تین میلا چوک کے قریب ملزم کے قبضے سے 174 گرام چرس برآمد ہوئی۔ گرفتار ملزم نے تعلیمی اداروں کے طلبا کو منشیات فروخت کرنے کا اعتراف کر لیا۔ کراچی میں کوریئر کے ذریعے نیوزی لینڈ بھیجے جانے والے پارسل سے 2.4 کلو گرام آئس برآمد ہوئی۔بلوچستان میں پشین کے علاقے میں ہوٹل کے قریب رکشہ میں چھپائی گئی 24 کلو گرام چرس برآمد کرکے افغان باشندے کو گرفتارکیا گیا۔ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

کریڈٹ: انڈیپنڈنٹ نیوز پاکستان-آئی این پی