اینٹی نارکوٹکس فورس (اے این ایف ) کی ملک گیر تین مختلف کارروائیوں میں 4 ملزمان گرفتا ر کرکے لاکھوںروپے مالیت کی20 کلو سے زائد منشیات برآمد کرلی گئی ۔ترجمان اینٹی نارکوٹکس فورس کے مطابق ملک کے مختلف شہروں میں منشیات اسمگلنگ اور خرید و فروخت کے خلاف اے این ایف کا کریک ڈائون جاری ہے، اس دوران 3 مختلف کارروائیوں میں 4 ملزمان کو گرفتار کرکے 40 لاکھ روپے سے زائد مالیت کی 20 کلو 800 گرام منشیات برآمد کرلی گئی۔اے این ایف حکام نے موٹروے ٹول پلازہ اسلام آباد کے قریب کار سے 14.4 کلوگرام افیون اور 4.8 کلوگرام چرس برآمد کرکے ملزم کو گرفتار کرلیا۔ اسی طرح موٹروے ٹول پلازہ اسلام آباد کے قریب مسافر بس میں سوار ملزم سے 900 گرام آئس برآمد ہوئی۔ادھر بند روڈ لاہور پر واقع بس اسٹینڈ کے قریب 2 ملزمان کے بیگ سے 700 گرام آئس برآمد ہوئی۔تمام کارروائیوں میں گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔

کریڈٹ : انڈیپنڈنٹ نیوز پاکستان-آئی این پی