آئی جی سندھ پولیس غلام نبی میمن نے کہا ہے کہ محکمے کو کالی بھیڑوں سے پاک کرکے نظام کو بہتر بنا رہے ہیں۔ سندھ پولیس کے نظام کو بہتر بنانے کے لئے آئی سندھ کا کہنا تھا کہ سندھ پولیس کے نظام و تفتیش میں بہتری لارہے ہیں۔ انہوں نے کہا کہ مجرمانہ سرگرمیوں میں ملوث یا سرپرستی کرنے والے افسران و اہلکاروں کے خلاف سخت کارروائی کی جائیگی۔ انہوں نے بتایا کہ سندھ پولیس میں مانیٹرنگ کا نظام بہتر بنایا جارہا ہے جس کے تحت تھانوں کو سی سی ٹی وی کیمروں کی مدد سے مانیٹر کیا جائے گا۔
آئی جی سندھ کے مطابق سی سی ٹی وی کیمروں کی مدد سے اعلی افسران ہر وقت کسی بھی تھانے کا جائزہ لے سکیں گے جبکہ پولیس موبائلز میں ٹریکر لگائے جانے کا عمل شروع کردیا گیا ہے۔ ان کا کہنا تھا کہ ابتدائی طور پر 9ہزار گاڑیوں میں سے تین ہزار گاڑیوں میں ٹریکر لگائے جائیں گے جس سے گاڑیوں کی نقل و حرکت کا ریکارڈ میسر ہوگا اور پیٹرول کا استعمال بھی مانیٹر کیا جائے گا۔ انہوں نے بتایا کہ مانیٹرنگ سے پیٹرول کہ غیر ضروری استعمال کو ختم کرکے بچت کو یقینی بنایا جائے گا۔ اس موقع پر انہوں نے اس عزم کا اعادہ کیا کہ امن و امان کی صورتحال کو ہر ممکن طریقے سے یقینی بنایا جائے گا اور منشیات فروشی کے خاتمے کے لئے ہر ممکن اقدامات کیے جائینگے۔
کریڈٹ:
انڈیپنڈنٹ نیوز پاکستان-آئی این پی