محکمہ زراعت نے کاشتکاروں کو مشروم کی کاشت کے لیے محکمانہ سفارشات پر عملدرآمد کی ہدایت کی ہے۔ محکمہ زراعت توسیع فیصل آبادکے ڈپٹی ڈائریکٹرچوہدری خالد محمودنے کہا ہے کہ کھمبی کو عرف عام میں مشروم بھی کہاجاتاہے، کاشتکار صدف نما کھمبی، بٹن یا یورپی کھمبی، چینی کھمبی، شاہ بلوط کی کھمبی سمیت دیگر اقسام کاشت کر کے بھاری منافع حاصل کرسکتے ہیں۔انہوں نے کہا کہ کھمبی یا مشروم میں لحمیات کی مقدار 21.7 سے لے کر 40.8 فیصد تک ہوتی ہے، کھمبی جہاں وٹامنز کا اہم ترین ذریعہ ہے وہیں اس کااستعمال شوگر، دل کے مریضوں کے لیے مثالی غذا اور موٹاپے کاشکار افراد کے لیے بہترین علاج بھی ہے۔ انہوں نے کہاکہ کھمبی کو پلاٹس، کھیتوں کے علاوہ کمروں، شیلفوں یا پولی تھین کے تھیلوں میں بھی کاشت کیاجا سکتا ہے۔ انہوں نے کہاکہ چاول کی پرالی یا گندم کے بھوسہ پر بھی کھمبی کی کاشت کامیاب ثابت ہوئی ہے۔ انہوں نے کہاکہ کاشتکار کھمبی کی کامیاب کاشت اور بہتر پیداوار کے لیے محکمہ زراعت کے فیلڈسٹاف سے بھی معاونت حاصل کر سکتے ہیں۔

کریڈٹ: انڈیپنڈنٹ نیوز پاکستان-آئی این پی