ابوجا(شِنہوا)نائیجیریا کے فوجیوں نے گزشتہ دو ہفتوں کے دوران کارروائیوں میں 40 مسلح افراد کو ہلاک کر دیا ہے۔

ایک فوجی ترجمان موسیٰ دانمادامی کے مطابق ملک کے شمال مشرقی حصے میں بوکو حرام اور داعش مغربی افریقہ صوبے کے گروپوں کے کم سےکم 18 ارکان مارے گئےجبکہ50سےزائد عسکریت پسندوں کو گرفتار کیا گیا۔انہوں نے کہا کہ فوجیوں نے 119 شہریوں کو بھی بازیاب کرایا جنہیں عسکریت پسندوں نے مبینہ طورپراغوا کیاتھا۔

دانمادامی نے کہا کہ شمالی وسطی علاقے میں کارروائی کے دوران آٹھ ڈاکوہلاک اور 28 گرفتار کئے گئے جبکہ اغوا کئے گئےپانچ افراد کو فوجیوں نے بازیاب کرایا۔

 انہوں نے کہا کہ ملک کے شمال مغربی حصے میں فوجیوں نے مجرموں کے انکلیو میں کارروائی کرتے ہوئے کم سےکم 14 ڈاکوؤں کو ہلاک کیا اور 16 مغوی شہریوں کو بازیاب کرایا۔

 فوج کی کارروائیوں کوقابل ستائش اور کامیاب قرار دیتے ہوئے دانمادامی نے کہا کہ کل 1 ہزار 506  دہشت گردوں اور ان کے خاندانوں کے ارکان نے کارروائیوں کے دوران مختلف مقامات پر سرکاری فوجیوں کے سامنے ہتھیار ڈال دیے جن میں154 مرد، 514 خواتین اور 838 بچے شامل ہیں۔

 نائیجیریا کے شمالی اور وسطی علاقوں میں مسلح حملے ایک بنیادی سیکورٹی خطرہ رہے ہیں، جو حالیہ مہینوں میں ہلاکتوں اور اغوا کے واقعات کا باعث بنے ہیں۔