سووا(شِنہوا)فجی میں پارلیمنٹ کے پہلے اجلاس کے موقع پر پیپلز الائنس(پی اے) پارٹی کے رہنماء سیتونی رابوکا کو آئندہ 4 سال کیلئے نئی مخلوط حکومت کا وزیراعظم منتخب کر لیا گیا ہے۔

فجی براڈکاسٹنگ کارپوریشن نے ہفتہ کے روز بتایا کہ 74 سالہ رابوکا کو 28 ووٹ جبکہ فجی فرسٹ پارٹی(ایف ایف پی) کے رہنماء ویریچی بینی ماراما کو 27 ووٹ ملے ہیں۔

دریں اثناء توئی کاکوا راتو نیچاما لالابالاوو کو پارلیمنٹ کا نیا اسپیکر منتخب کر لیا گیا ہے۔

گزشتہ بدھ کو منعقد ہونیوالے رواں سال کے عام انتخابات میں ایف ایف پی نے 26، پی اے نے 21، اسکی شراکت دار نیشنل فیڈریشن پارٹی( این ایف پی) نے 5 اور سوشل ڈیموکریٹک لبرل پارٹی(سوڈیلپا) نے 3 نشستیں حاصل کی ہیں۔

فجی کے انتخابی نظام کے تحت اگر کوئی پارٹی 55 رکنی پارلیمان میں 28 یا اس سے زیادہ نشستیں جیت لیتی ہے تو وہ حکومت بنا سکتی ہے۔ ایف ایف پی 2014ء سے برسراقتدار تھی لیکن اس بار پارٹی پارلیمنٹ میں اکثریت حاصل کرنے میں ناکام رہی ہے۔

پی اے اور این ایف پی الیکشن سے قبل ہی اتحاد کر چکی ہیں۔سوڈیلپا نے جمعہ کے روز پی اے اور این ایف پی کے ساتھ ملکر مخلوط حکومت بنانے کا فیصلہ کیا ہے ، نئی مخلوط حکومت کے پاس پارلیمنٹ میں 29 نشستیں ہوں گی۔

رابوکا 1992ء سے 1999ء تک فجی کے وزیراعظم رہ چکے ہیں۔