تہران(شِنہوا)ایران اور جبوتی نے اپنے عوام کے مفادات اور امنگوں کے مطابق سفارتی تعلقات دوبارہ شروع کرنے کا فیصلہ کیا ہے۔

ایرانی وزارت خارجہ نے اپنی ویب سائٹ پرجمعہ کو جاری ایک بیان میں کہا کہ یہ فیصلہ جمعرات کو نیویارک میں اقوام متحدہ کی جنرل اسمبلی کے 78ویں اجلاس کے موقع پر ایرانی وزیر خارجہ حسین امیر عبداللہ اور ان کے جبوتی کے ہم منصب محمود علی یوسف کے درمیان ملاقات میں کیا گیا۔

بیان کے مطابق ایران اور جبوتی کی حکومتوں نے ایک دوسرے کی خودمختاری، مساوات، مشترکہ مفادات اور پرامن بقائے باہمی کے احترام کی بنیاد پر اپنے دوطرفہ دوستانہ تعلقات کو مزید فروغ دینے پر اتفاق کیا۔

بیان میں مزید کہا گیا کہ دونوں ممالک نے سرمایہ کاری، تجارت، سائنس اور ٹیکنالوجی کے اختراع سمیت متعدد شعبوں میں دوطرفہ تعاون کو بڑھانے کا فیصلہ کیا۔

جمعہ کو ایرانی وزارت خارجہ کی ویب سائٹ پر شائع ہونے والے ایک الگ بیان کے مطابق دونوں وزرائے خارجہ کے درمیان ملاقات "دوستانہ ماحول" میں ہوئی۔

امیرعبداللہیان نے ایران کی مسلم اور برادر ریاستوں کے ساتھ تعلقات کو وسعت دینے پر آمادگی کا اظہار کرتے ہوئے کہا کہ ایران جبوتی کے ساتھ اپنی سائنسی اور ٹیکنالوجی کی صلاحیتوں کا تبادلہ کرنے کے لیے تیار ہے۔

انہوں نے اپنے جبوتی کے ہم منصب کو جلد ایران کا دورہ کرنے کی دعوت بھی دی۔

 جبوتی کے وزیر خارجہ نے اس حوالے سے کہا کہ ان کے ملک اور ایران کے درمیان ماضی میں ہمیشہ "اچھے اور تعمیری" تعلقات رہے ہیں جبکہ جبوتی دو طرفہ تعلقات کو مضبوط بنانے کے لیے مکمل طور پرتیارہے۔