مزار شریف(شِنہوا)افغانستان کے شمالی حصے میں بارشوں اور طوفانی سیلاب نے رہائشی مکانات اور کھیتوں کو تباہ کر دیا ہے۔

صوبائی پولیس کے ترجمان محمد آصف وزیری نے جمعہ کو نامہ نگاروں کو بتایا کہ جمعرات کی شام  کوشدید بارشیں تباہ کن سیلاب کا باعث بنیں جس سے شمالی صوبہ بلخ کے ضلع زری اور اس کے آس پاس کے علاقوں میں 300 سے زائد مکانات اور3 ہزار ایکڑ کھیت جزوی یا مکمل طور پر تباہ ہو گئے۔ 

اہلکار نے بتایا کہ سیلاب  سےضلع زری اور ملحقہ علاقوں میں متعدد مویشی بھی مارے گئے ہیں۔

اہلکار نے بتایا کہ جانی نقصان کی کوئی اطلاع نہیں ہے جبکہ متاثرہ خاندانوں کی مدد کے لیے امدادی ٹیمیں متاثرہ علاقوں میں بھیج دی گئی ہیں۔

 شدید سیلاب سے صوبہ زابل کے دارالحکومت قلات کا افغانستان کے جنوبی علاقے کے سات اضلاع سے رابطہ بھی منقطع ہو گیا ہے۔

افغانستان کے محکمہ موسمیات نے آنے والے دنوں میں ملک کے 34 میں سے 20 صوبوں میں مزید بارشوں اور سیلاب کی پیش گوئی کی ہے۔