بشکیک(شِنہوا)چین کے وزیر اعظم لی چھیانگ نے کہا ہے کہ ان کا ملک اقوام متحدہ، شنگھائی تعاون تنظیم (ایس سی او)، برکس اور دیگر کثیر جہتی فورمز کے اندر ایران کے ساتھ رابطے وتعاون کو مضبوط بنانے، حقیقی کثیرالجہتی پر عمل کرنے اور ترقی کے مشترکہ مفادات کےتحفظ کےلیےتیارہے۔

لی نے یہ بات شنگھائی تعاون تنظیم کے رکن ممالک کے سربراہان حکومت کی کونسل کے 22ویں اجلاس کے موقع پر ایران کے نائب صدر محمد مخبر سے ملاقات کے دوران کہی۔

لی چھیانگ نے کہا کہ چین اور ایران کے سفارتی تعلقات کے قیام کے 50 سال سے زائد عرصے سے اب تک دو طرفہ تعلقات  نے اتار چڑھاؤ والی بین الاقوامی صورتحال کا مقابلہ کیا ہے اور مستحکم پیش رفت کی ہے جبکہ صدر شی جن پھنگ اور ایرانی صدر ابراہیم رئیسی نے اس سال دو مرتبہ ملاقات کی  اور اہم اتفاق رائے قائم کیا۔

چینی وزیراعظم نے مزید کہا کہ چین ایران کے ساتھ مل کر دونوں سربراہان مملکت کے درمیان طے پانے والے اہم اتفاق رائے کو عملی جامہ پہنانے، چین ایران جامع سٹرٹیجک شراکت داری کے مقصد کو تقویت دینے اور دونوں ممالک کے عوام کو مزید فوائد پہنچانے کے لیے تیار ہے۔

چین کےوزیراعظم لی چھیانگ کرغزستان کےشہربشکیک میں شنگھائی تعاون تنظیم (ایس سی او)کےرکن ممالک کے سربراہان حکومت کی کونسل کے 22ویں اجلاس کے موقع پر ایران کے نائب صدرِاول محمد مخبر سے ملاقات کر رہے ہیں۔(شِنہوا)

انہوں نےزور دے کر کہا کہ چین ایران کی قومی خودمختاری، علاقائی سالمیت اور قومی وقار کے تحفظ کے لیے اس کی بھرپور حمایت جاری رکھے گا اور ایران کے اندرونی معاملات میں کسی بھی بیرونی طاقت کی مداخلت کی سختی سے مخالفت کرے گا۔