پاکستانی پنجابی فلموں کے معروف اداکار سلطان راہی کی جمعرات کے روز 29 ویں برسی منائی گئی۔سلطان راہی 24 جون 1938 کو راولپنڈی میں پیدا ہوئے اور 1959 میں فلمی دنیا میں قدم رکھا۔ ان کے فلمی سفر نے پنجابی سینما کو نئی بلندیوں پر پہنچایا۔ ان کی فلمیں باکس آفس پر بے مثال کامیابی حاصل کرتی رہیں اور ان کے ڈائیلاگز کا ہر جگہ چرچا رہا۔ مصطفی قریشی کے ساتھ سلطان راہی کی جوڑی نے فلموں کی کامیابی میں اہم کردار ادا کیا۔ ان کی فلم مولا جٹ کی کامیابی آج بھی یاد کی جاتی ہے۔ ان کی یادگار فلموں میں "شعلے"، "چن وریام"، "شیر خان"، "وحشی جٹ"، اور "سالا صاحب" شامل ہیں جو آج بھی فلمی دنیا کی میراث سمجھی جاتی ہیں۔سلطان راہی نے 800 سے زائد فلموں میں کام کر کے عالمی ریکارڈ قائم کیا۔ انہیں صدارتی ایوارڈ سمیت 150 سے زائد ملکی اور غیر ملکی اعزازات سے نوازا گیا۔ 9 جنوری 1996 کو گوجرانوالہ کے قریب ڈاکوں نے ان کی زندگی کا چراغ گل کر دیا، لیکن ان کی یادیں آج بھی لوگوں کے دلوں میں زندہ ہیں۔

کریڈٹ : انڈیپنڈنٹ نیوز پاکستان-آئی این پی