بالی ووڈ کے سپر اسٹار اداکار شاہ رخ خان، اجے دیوگن اور ٹائیگر شروف کو گمراہ کن اشتہار پر عدالت میں حاضر ہونے کا نوٹس جاری کر دیا گیا۔بھارتی میڈیا رپورٹس کے مطابق ریاست راجستھان کے شہر کوٹا میں بالی ووڈ کے اداکاروں کے خلاف پان مسالہ برانڈ الائچی کی توثیق کرنے پر شکایت درج کرائی گئی ہے، جس کے بعد ان تینوں کے خلاف قانونی کارروائی شروع ہو گئی ہے۔شاہ رخ خان، اجے دیوگن اور ٹائیگر شروف کے پان مسالہ برانڈ کے گمراہ کن اشتہار اور اس کی ٹیگ لائن بولو زبان کیسری نے سب کی توجہ حاصل کر لی ہے، جس کے سبب اندر موہن سنگھ ہانی نامی شخص نے تینوں اداکاروں کے خلاف شکایت درج کرائی ہے۔انہوں نے شکایت میں دعوی کیا ہے کہ اشتہار میں جھوٹی معلومات کو فروغ اور خاص طور پر نوجوانوں کو نشانہ بنایا جا رہا ہے۔شکایت کنندہ کا کہنا ہے کہ شاہ رخ خان، اجے دیوگن، اور ٹائیگر شروف کئی نوجوانوں کے لیے رول ماڈل ہیں اور وہ ایسی پروڈکٹ جس میں زعفران شامل نہیں، اس کی توثیق کر کے نوجوانوں کو گمراہ کر رہے ہیں۔

کریڈٹ: انڈیپنڈنٹ نیوز پاکستان-آئی این پی