بالی ووڈ اداکار ورون ڈھون پاکستان فلم و ٹی وی کے معروف اداکار سعود کی مقبولیت دیکھ کر حیران رہ گئے۔ ایک ٹی وی شو میں اداکار سعود کی اہلیہ اداکارہ جویریہ سعود نے بتایا کہ ان کا بیٹا ابراہیم بھارتی اداکار ورون دھون کا بہت بڑا فین تھا ۔ ایک بار ابوظہبی میں ورون دھون اپنی ایک فلم کی شوٹنگ میں مصروف تھے جہاں جا کر ہم نے ان سے ملاقات کی اس دوران ورون دھون نے بچوں سے ملاقات کی، ان کے ساتھ تصویر بھی لی۔جویریہ سعود کا کہنا تھا کہ ورون نے پھر ان سے پوچھا کہ سنا ہے آپ کے شوہر بھی ایک ایکٹر ہیں جس پر میں نے کہا کہ ہاں وہ ایکٹر ہیں میں ان سے آپ کو ملواتی ہوں۔جویریہ سعود کا کہنا تھا کہ سعود اس وقت ایک گاڑی میں بیٹھے تھے، جو کہ ایک کھلے میدان میں کھڑی تھی، میں سعود کو جب یہ بتانے گئی تو سعود نے کہا کہ میں کیا کروں گا اس سے ملکر، لیکن میرے اصرار پر وہ گاڑی سے باہر آگئے۔اس وقت اس میدان میں کوئی تعمیراتی کام چل رہا تھا، جس میں ڈیڑھ سو کے قریب پاکستانی مزدور کام کررہے تھے، انہوں نے جب سعود کو دیکھا تو حیران رہ گئے اور سعود کو گھیر لیا، سعود کے ساتھ تصویریں بنانے لگے اور انہیں چھوڑنے کا نام نہیں لے رہے تھے۔ورون ڈھون دلچسپی سے یہ سب دیکھ رہے تھے اور میں جب ان کے پاس گئی تو ورون نے کہا کہ آپ کے شوہر تو بہت بڑے اداکار ہیں ، ہمیں تو یہاں کوئی پوچھ ہی نہیں رہا ۔جویریہ نے مزید بتایا کہ سعود سے ملتے وقت پاکستانی مزدوروں کے چہروں پر جو خوشی تھی وہ بیان سے باہر ہے، میں نے سعود سے اسی وقت کہا تھا کہ اللہ ایسے کسی کو عزت دیتا ہے۔

کریڈٹ: انڈیپنڈنٹ نیوز پاکستان-آئی این پی