سینئر اداکار نعمان مسعود نے شادی شدہ خواتین بالخصوص نئی نویلی دلہنوں کو چند قیمتی مشورے دے دیے۔ ایک انٹرویو کے دوران نعمان مسعود کا کہنا تھا کہ اگر دلہن شادی کے فورا بعد ہی اپنی مرضی تھوپنے کی کوشش کرے گی تو رشتہ نازک ہو سکتا ہے۔نعمان مسعود نے کہا کہ کسی بھی نئے گھرانے میں دلہن کو پہلے تھوڑا وقت دینا چاہیے، گھر کے ماحول کو سمجھنا چاہیے اور وقتی حالات سے گزر کر رشتے میں پختگی لانی چاہیے۔ انہوں نے مزید کہا کہ جو رشتے مضبوط ہوتے ہیں، ان میں برداشت اور لچک ہوتی ہے، لیکن جب ضد اور انا درمیان میں آجائے تو وہ رشتے ٹوٹنے میں دیر نہیں لگاتے۔ انہوں نے خواتین کو مشورہ دیا کہ وہ جلدی غصے میں نہ آئیں، کیونکہ آج کل کے دور میں لوگوں میں برداشت کی کمی بڑھ گئی ہے، بعض اوقات کسی کو نصیحت دینے کے بجائے وقت دینا ہی زیادہ موثر ثابت ہوتا ہے کیونکہ وقت بہترین مرہم بھی ہے اور استاد بھی۔

کریڈٹ: انڈیپنڈنٹ نیوز پاکستان-آئی این پی