اداکارہ یشما گل نے اپنے شوبز انڈسٹری چھوڑنے کے حوالے سے پھیلی خبروں کی تردید کی ہے۔چند روز قبل گورنر ہائوس کراچی میں ڈاکٹر ذاکر نائیک کے ایک عوامی اجتماع میں یشما گل کے سوال کے جواب میں ڈاکٹر ذاکر نائیک نے ان کی دین کی طرف واپسی اور کی تعریف کرتے ہوئے کہا کہ آپ فلم انڈسٹری سے واپس صحیح راستے پر آئیں، میڈیا کے جال میں پھنسنے کے بعد نکلنا بہت مشکل ہے لیکن اللہ بہت لوگوں کو ہدایت دے رہا ہے۔ ان کے جواب سے لوگوں میں یہ تاثر پیدا ہوا کہ یشما گل نے شوبز انڈسٹری کو خیرباد کہہ دیا ہے جس پر یشما گل نے انسٹاگرام پر وضاحت کرتے ہوئے کہا کہ انہوں نے اداکاری نہیں چھوڑی۔ان کا کہنا تھا کہ وہ اب بھی شوبز انڈسٹری کا حصہ ہیں اور بطور اداکارہ کام کر رہی ہیں، سوال کے دوران مائیک میں مسائل کی وجہ سے ان کی بات ٹھیک طرح سے نہیں پہنچ سکی جس سے غلط فہمی پیدا ہوئی۔ اداکارہ نے کہا کہ انہوں نے اس جواب پر ذاکر نائیک کو ٹوکنا مناسب نہیں سمجھا تاہم اگر ان کی کسی بات سے کسی کے جذبات مجروح ہوئے ہوں تو وہ معذرت خواہ ہیں۔

کریڈٹ: انڈیپنڈنٹ نیوز پاکستان-آئی این پی