مقبول بھارتی ریپر و گلوکار یو یو ہنی سنگھ نے اپنے اگلے بین الاقوامی ٹور کے بعد پاکستان ٹوور کا اعلان کرتے ہوئے مداحوں کو خوشخبری سنادی۔حال ہی میں آئیفا ایوارڈز 2024 کی تقریب کے ریڈ کارپٹ سے فوٹو اینڈ ویڈیو شیئرنگ ایپ انسٹاگرام پر یو یو ہنی سنگھ کا ایک کلپ وائرل ہورہا ہے۔ویڈیو میں بھارتی پاپ اسٹار ہنی سنگھ جلد پاکستان میں اپنے کانسرٹ کے حوالے سے بات کرتے نظر آرہے ہیں۔ویڈیو میں دیکھا جاسکتا ہے کہ آئیفا ایوارڈز کی ریڈ کارپٹ پر ایک پاکستانی صحافی کی جانب سے ریپر و گلوکار یو یو ہنی سنگھ سے سوال کیا گیا کہ آپ پاکستان کب آئیں گے؟ وہاں بھی آپ کے مداح موجود ہیں جو آپ کا بے صبری سے انتظار کررہے ہیں؟جواب دیتے ہوئے ریپر و گلوکار کا کہنا تھا کہ میں 12 سال سے دبئی میں اپنے کانسرٹ کررہا ہوں جہاں بھارتی مداحوں کے ساتھ ساتھ پاکستانی پرستاروں کی بھی ایک کثیر تعداد موجود ہوتی ہے۔ہنی سنگھ کا کہنا تھا کہ مجھے کانسرٹس کے بعد اور دورانِ کانسرٹ بھی بہت سے پاکستانی مداح کہتے ہیں کہ ہمارے پاس دولت ہے تو ہم آپ کو سننے دبئی آجاتے ہیں لیکن پاکستان میں بہت سے ایسے مداح ہیں جو آپ کو سننا تو چاہتے ہیں لیکن وسائل کی کمی ایسا ممکن ہونے نہیں دیتی، آپ پاکستان میں بھی شو کریں۔بھارتی ریپر و گلوکار ہنی سنگھ کی جانب سے اپنے پاکستان ٹوور کی تصدیق کرتے ہوئے کہا گیا کہ اگلے سال میرا انگلینڈ کا ٹوور ہے جہاں میں پہلی بار پرفارم کررہا ہوں، انگلینڈ کے بعد اگر وقت ملا تو میں پاکستان بھی ضرور آئوں گا۔

کریڈٹ: انڈیپنڈنٹ نیوز پاکستان-آئی این پی