ماضی کے مقبول فلم ساز ناصر ادیب نے کہا ہے کہ انہوں نے بیٹی زویا ناصر کو شوبز میں کام کرنے سے نہیں روکا، البتہ انہوں نے بیٹی کو التجا کی تھی کہ شوبز انڈسٹری میں کوئی ایسا کام نہ کرنا کہ ان کا سر شرم سے جھک جائے۔ناصر ادیب نے حال ہی میں یوٹیوبر کو دیے گئے انٹرویو میں بیٹی کی اداکاری اور ان کی جانب سے شوبز انڈسٹری میں آنے کے فیصلے سے متعلق کھل کر بات کی۔فلم ساز نے واضح کیا کہ ان کے خیال میں ان کی بیٹی زویا ناصر فلموں کے لیے موزوں نہیں، البتہ وہ ڈراموں کے لیے بہترین انتخاب ہو سکتی ہیں۔ان کا کہنا تھا کہ انہوں نے کبھی بھی بیٹی کے لیے کوئی فلم لکھنے کا نہیں سوچا، کیوں کہ وہ عام طور پر پنجابی طرز کی فلمیں بناتے ہیں، جس کے لیے وہ اپنی بیٹی زویا کو ناموزوں سمجھتے ہیں۔ان کے مطابق انہوں نے کبھی بیٹی کے لیے کوئی سفارش نہیں کی اور انہوں نے شوبز آنے سے قبل ہی زویا کو بتایا تھا کہ وہ ان کے لیے کبھی کسی کو سفارش نہیں کریں گے۔ناصر ادیب کے مطابق فلم انڈسٹری خراب نہیں بلکہ اس میں موجود بعض لوگ خراب ہوتے ہیں، اس لیے انہوں نے بیٹی کو شوبز میں آنے سے قبل التجا کی تھی کہ شوبز انڈسٹری میں جاکر کوئی ایسا کام نہ کرنا کہ ان کے والد کا سر شرم سے جھک جائے۔

کریڈٹ: انڈیپنڈنٹ نیوز پاکستان-آئی این پی