معروف اداکار احسن خان نے کہا ہے کہ اسموگ کے مسئلے پر بات کرنے سے زیادہ ضروری اسے ختم کرنے بارے اقدامات کرنا ہیں۔ احسن خان نے اپنے آفیشل انسٹاگرام اکائونٹ پر پوسٹ کردہ ویڈیو میں اسموگ کی روک تھام کیلئے حکومتی اقدمات کو سراہتے ہوئے کچھ دلچسپ تجاویز بھی دیں۔ویڈیو کے کیپشن میں احسن خان نے لکھا کہ قومیں اپنے مسائل مل جل کر حل کرتی ہیں، ہمیں تعاون اور افہام و تفہیم کے ساتھ مسائل کے حل پر توجہ دینی چاہیے۔انہوں نے مزید لکھا کہ مختلف شہروں اور ان کے کلچرز کے بارے میں مثبت مکالمے کی حوصلہ افزائی کرنا لوگوں کے درمیان اتحاد اور احترام کو فروغ دے سکتا ہے، اپنے درمیان اختلافات کا اعتراف کرتے ہوئے ہم اپنے مشترکہ چیلنجز سے نمٹنے کے لیے مل کر کام کر سکتے ہیں۔ویڈیو میں احسن خان کا کہنا تھا کہ اسموگ کے مسئلے پر بات کرنے سے زیادہ اس چیز کی نشاندہی ضروری ہے کہ اسے ختم کیسے کیا جائے، مہذب اقوام کا یہی وطیرہ ہے کہ وہ اتحاد و اتفاق سے مشترکہ مسائل کا حل نکالتی ہیں۔

کریڈٹ: انڈیپنڈنٹ نیوز پاکستان-آئی این پی