سلیکان ویلی میں قائم ٹیکنالوجی سرمایہ کار پلگ اینڈ پلے ٹیک سنٹر سعودی ٹیک اسٹارٹ اپ میں سرمایہ کاری کے لیے 10کروڑ ڈالر جمع کرنے کی کوشش کر رہا ہے،اس نے ڈراپ باکس انکارپوریٹڈ اور پے پال ہولڈنگز انکارپوریٹڈ سمیت کمپنیوں کی ابتدائی مالی معاونت کی تھی،پلگ اینڈ پلے سنٹر ممکنہ طور پر سعودی عرب کے خودمختار دولت فنڈ کے ایک یونٹ کی معاونت سے نئی سرمایہ کاری کرے گا،کمپنی کے بانی اور سی ای او سعید عمیدی نے دارالحکومت ریاض میں ایک انٹرویو کے دوران کہا کہ پلگ اینڈ پلے سعودی دولت فنڈ کے قائم کردہ ایک ارب ڈالر کے فنڈ جادا کے ساتھ بات چیت کر رہا ہے تاکہ گھریلو وینچر کیپیٹل انڈسٹری کو شروع کرنے میں مدد مل سکے،انھوں نے کہا کہ یہ فنڈ آئندہ جنوری تک شروع کیا جائے گا، جس میں پلگ اینڈ پلے مجموعی طور پر 10فی صد حصہ ڈالے گا اور باقی سعودی فنڈز اور خاندانی دفاتر سے جمع کیا جائے گا۔عمیدی نے کہا کہ گذشتہ چند سال میں سعودی اسٹارٹ اپس کے معیار میں بہتری آئی ہے۔اس لیے پلگ اینڈ پلے فنڈ یہاں اپنا منصوبہ شروع کر رہا ہے،انھوں نے کہاکہ ہم اپنے معیار کو کم نہیں کریں گے،ہم امریکااور جرمنی میں سرمایہ کاری کرتے ہیں ،ہمارا کوالٹی کنٹرول صرف اس وجہ سے تبدیل نہیں ہونے والا ہے کہ یہ سعودی عرب ہے، اور اگر مجھے اعلی معیار کے اسٹارٹ اپ نہیں مل سکے تو میں سرمایہ کاری نہیں کروں گا،عمیدی نے کہا کہ پلگ اینڈ پلے سنٹر پانچ فنڈز کے پورٹ فولیو کا انتظام کرتا ہے ، جس کی مجموعی مالیت 50کروڑ ڈالر ہے اور مزید پانچ قائم کرنے کا ارادہ رکھتا ہے۔

کریڈٹ: انڈیپنڈنٹ نیوز پاکستان-آئی این پی