جنوبی کیرولائنا کی سابق گورنر اور اقوام متحدہ کی سفیر نکی ہیلی نے 2024میں امریکی صدارتی الیکشن لڑنے کا اعلان کر دیا، ٹوئٹر پر جاری اپنے ایک ویڈیو بیان میں نکی ہیلی کا کہنا تھا کہ اب پیچھے ہٹنے کا وقت نہیں ہے، اب ایک مضبوط اور قابل فخر امریکا کا وقت ہے،غیر ملکی میڈیا کے مطابق 51 سالہ گورنر امریکی صدارتی انتخاب لڑنے والی دوسری بڑی ریپبلکن امیدوار ہیں جبکہ وہ تیسری ہندوستانی نژاد امریکی ہیں جنہوں نے صدارتی الیکشن میں حصہ لینے کا اعلان کیا ہے،2021میں انہوں نے کہا تھا کہ وہ وائٹ ہائوس کے لیے ٹرمپ کو چیلنج نہیں کریں گی لیکن حالیہ مہینوں میں انہوں نے اپنا موقف تبدیل کرتے ہوئے کہا کہ اب نئی نسل کو آگے آنے کی ضرورت ہے،دیگر ریپبلکن جن کو وائٹ ہائوس کی اپنی مہم شروع کرنے کا مشورہ دیا گیا ہے ان میں فلوریڈا کے گورنر رون ڈی سینٹیس اور سابق نائب صدر مائیک پینس شامل ہیں،دوسری جانب آئندہ صدارتی انتخابات کے حوالے سے پولنگ فرم ٹریفلگر گروپ کے حالیہ سروے میں موجودہ اور ممکنہ امیدواروں کو شامل کیا گیا ہے جس میں ٹرمپ 43فیصد کے ساتھ پہلے اور ہیلی 12فیصد کے ساتھ چوتھے نمبر پر ہیں۔

کریڈٹ: انڈیپنڈنٹ نیوز پاکستان-آئی این پی