روسی صدر ولادیمیر پیوٹن پر تنقید کرنے والے شیف کی سربیا کے ہوٹل سے لاش برآمد ہوئی ہے۔غیر ملکی میڈیا رپورٹ کے مطابق اس حوالے سے سربیا کے حکام نے کہا ہے کہ 52 سالہ الیکسی زیمین موت کے حوالے سے کوئی مشتبہ معاملہ ان کے گرد نہیں تھا،پوسٹ مارٹم کی رپورٹ مکمل ہونے کا عمل جاری ہے۔ میڈیا کے مطابق الیکسی زیمین اپنی نئی کتاب کی تشہیر کے لیے سربیا گئے تھے۔ رپورٹ کے مطابق شیف الیکسی زیمین روسی ٹیلی وژن پر بھی لائیو آیا کرتے تھے اور وہ یوکرین جنگ کے حوالے سے صدر ولادیمیر پیوٹن پر تنقید کرنے والوں میں شامل تھے۔ میڈیا رپورٹ کے مطابق انہوں نے 2014 میں ملک چھوڑنے کے بعد لندن میں اپنا گھر اور کاروبار قائم کیا تھا لیکن وہ روسی نشریاتی ادارے NTV پر ایک مشہور شو کے میزبان رہے۔ 2022 میں یوکرین پر روسی حملے کے بعد سوشل میڈیا پر جنگ مخالف پیغام پوسٹ کرنے کے بعد ان کے شو کو ختم کر دیا گیا تھا۔ برطانیہ آنے کے بعد سے الیکسی زیمین دوبارہ کبھی روس نہیں گئے تھے۔

کریڈٹ: انڈیپنڈنٹ نیوز پاکستان-آئی این پی