حزب اللہ کے شہید سربراہ حسن نصراللہ کی تدفین بڑے عوامی اجتماع میں آج (اتوار کو) کولبنان کے دارالحکومت بیروت میں کی جائے گی ۔غیرملکی خبررساں ا دارے کے مطابق جنازے کا اجتماع پاکستانی وقت کے مطابق شام 4 بجے بیروت کے مضافات میں سپورٹس اسٹیڈیم میں منعقد ہوگا، جنازے کے اجتماع سے حزب اللہ سربراہ نعیم قاسم خطاب کریں گے۔ گزشتہ برس 27 ستمبر کو اسرائیلی حملے میں شہید ہونے والے حسن نصر اللہ کو بیروت میں ائیرپورٹ روڈ کے قریب سپرد خاک کیا جائے گا۔حسن نصراللہ کی شہادت کے بعد منتخب ہونے والے سیکرٹری جنرل شہید ہاشم صفی الدین کی نماز جنازہ بھی ساتھ ادا کی جائیگی۔حزب اللہ کا کہنا ہے کہ جنازے کا اجتماع ایک تاریخی دن اور موقع ہوگا، لوگوں کی شرکت بہت بڑی تعداد میں ہوگی اور اسرائیل دیکھے گا کہ ہم خوفزدہ نہیں۔عرب میڈیا کے مطابق حسن نصراللہ کی تدفین سے قبل بغداد سے بیروت کی پروازوں کے تمام ٹکٹ فروخت ہوچکے ہیں، جبکہ حسن نصراللہ کی نماز جنازہ میں ایرانی وزیرخارجہ عباس عراقچی بھی شریک ہوں گے۔لبنانی سول ایوی ایشن کا کہناہے 23 فروری کو تدفین کیموقع پر بیروت ائیرپورٹ دوپہر 12 بجے سے شام 4 بجے تک بند رہے گا۔خیال رہے کہ حسن نصراللہ کو 27 ستمبر کو اسراییلی حملے میں شہید ہونے کے بعد امانتا دفن کردیاگیا تھا۔

کریڈٹ: انڈیپنڈنٹ نیوز پاکستان-آئی این پی