غزہ جنگ سے متعلق اسٹوری پوسٹ کرنے پر انسٹا گرام نے بین الاقوامی انویسٹی گیٹیو رپورٹنگ کیلئے 2022میں پولیٹزر پرائز جیتنے والی نامور امریکی صحافی عظمت خان کا اکائونٹ بلاک کردیا،خاتون امریکی صحافی عظمت خان کا کہنا تھا کہ سوشل میڈیا پلیٹ فارم انسٹاگرام پر غزہ جنگ کے بارے میں اسٹوری پوسٹ کرنے کے بعد ان کے انسٹاگرام اکاونٹ پر شیڈو پابندی لگا دی گئی یعنی انہیں بتائے بغیر ان کا اکاونٹ بلاک کر دیا گیا ہے،سماجی رابطوں کی ویب سائٹ ایکس پر اپنی پوسٹ میں انہوں نے کہا کہ ان کے کئی ساتھیوں اور صحافیوں کے سوشل میڈیا اکاونٹس پر بھی شیڈوپابندیاں لگائی جا رہی ہیں۔عظمت خان کا کہنا تھا کہ یہ باوثوق صحافت اور انفارمیشن کے آزادانہ بہاو پر غیر معمولی حملہ ہے۔بین الاقوامی ایوارڈ یافتہ خاتون صحافی نے مزید کہا ہے کہ غزہ پٹی میں صحافیوں کی ہلاکتوں، انٹرنیٹ اور بجلی کی بندش وغیرہ کی وجہ سے پہلے ہی آن گراونڈ انفارمیشن کا حصول مشکل ہو رہا ہے اور اب شیڈو پابندیوں کی وجہ سے غزہ جنگ میں آزادیِ صحافت پر پریشان کن سوالات اٹھنے شروع ہو گئے ہیں۔عظمت خان کے اِس انکشاف کے جواب میں ایک اور انویسٹی گیٹیو صحافی ایلے ساندرو ایکورسی نے کہا کہ انسٹاگرام اور فیس بک پر شیڈو پابندی سے غزہ جنگ کی ویڈیوز اور تصاویر کا قیمتی ڈیٹا بھی بلاک کیا جا رہا ہے۔

کریڈٹ: انڈیپنڈنٹ نیوز پاکستان-آئی این پی