اسرائیلی فوج کے اعلان کے بعد کہ اگر ضرورت پڑی تو وہ لبنان کے اندر جارحانہ کارروائی کرنے کی تیاری کر رہی ہے۔ عرب میڈیا کے مطابق اسرائیلی وزیر اعظم نیتن یاہو نے کہا کہ انہوں نے فوج کو لبنان کے ساتھ سرحد پر شمالی اسرائیل کی صورت حال کو تبدیل کرنے کے لیے ہدایات جاری کردی ہیں،انہوں نے کہا کہ حزب اللہ ایران کا مضبوط بازو ہے، شمال میں ایسے حالات جاری رہنا ناممکن ہے۔ ان حالات کو تبدیل کیا جائے گا۔ انہوں نے شمال کے تمام رہائشیوں کو ان کے گھر واپس کرنے کے اپنی حکومت کے عزم کا اعادہ بھی کیا۔ صیہونی وزیر اعظم نے کہا کہ ان کا ملک برائی کے ایرانی محور کے خلاف جنگ میں ہے اور تہران کو ایٹمی ہتھیار رکھنے سے روکنے کا پابند ہے۔ انہوں نے مزید کہا کہ اگر تل ابیب نے گزشتہ برسوں میں کارروائی نہ کی ہوتی تو تہران اب تک جوہری ہتھیار حاصل کر چکا ہوتا۔ نیتن یاہو کے یہ بیانات اسرائیلی فوج کے چیف آف سٹاف ہرزی ہیلیوی کے اس اعلان کے بعد سامنے آئے ہیں کہ ان کی افواج لبنان کے اندر جارحانہ اقدامات کرنے کی تیاری کر رہی ہیں۔

کریڈٹ: انڈیپنڈنٹ نیوز پاکستان-آئی این پی