دبئی میں ایک 4 رکنی نوسرباز گروہ نے پولیس کا روپ دھار کر تقریبا 5 لاکھ درہم لوٹ لیے۔ گزشتہ روز خلیج ٹائمز کے مطابق 4 ا فراد کو پولیس افسران کا روپ دھار کر ایک شخص سے 4 لاکھ 89 ہزار 650 سعودی ریال (4 لاکھ 78 ہزار 550 درہم ) لوٹنے کے الزام میں گرفتار کیا گیا ہے۔ استغاثہ کی تحقیقات کے مطابق ملزمان نے متاثرہ شخص سے رابطہ کیا کیوں کہ انہیں شبہ تھا کہ وہ رقم کی غیر قانونی منتقلی کی سرگرمیوں میں ملوث ہے، انہوں نے اس کے لیے جال بچھا کر اسے ایک عوامی علاقے میں پھنسایا جہاں ان افراد نے اسے بتایا کہ وہ پولیس اہلکار ہیں اور اس شخص کو بڑی مقدار میں غیر قانونی نقدی رکھنے پر گرفتار کیا گیا ہے۔چوں کہ ان میں سے ایک شخص دبئی ٹریفک پولیس کی مخصوص وردی میں ملبوس تھا، اس لیے متاثرہ شخص کو کسی بھی قسم کی گڑبڑ کاشبہ نہیں ہوا اور اس نے رقم ان کے حوالے کر دی، ملزمان نے استغاثہ کو بتایا کہ انہوں نے رقم آپس میں بانٹ لی، عدالت نے چار افراد کے گینگ کو قید کی سزا سنائی ہے، انہیں چوری کی رقم ادا کرنے کا حکم دیا جو کہ برآمد نہ ہو سکی جب کہ پانچویں مدعا علیہ کو بری کر دیا گیا-

کریڈٹ: انڈیپنڈنٹ نیوز پاکستان-آئی این پی