برطانیہ میں کتوں کے حملوں کی تعداد اضافے، بچوں کو نشانہ بنائے جانے اور کئی خاندانوں کو دہشت زدہ کردینے کے واقعات کے بعد برطانوی وزیر اعظم رشی سونک نے امریکی کتوں کی خریداری پر پابندی کا فیصلہ کرلیا۔ غیرملکی میڈیا کے مطابق برطانیہ کے وزیر اعظم رشی سونک نے کہا ہے کہ خطرناک حملوں کے بعد امریکی (XL بلی)کتوں پر برطانیہ میں پابندی عائد کی جائے گی۔ اس نسل کے امریکی کتوں کی درآمد برطانوی معاشرے کے لیے خطرہ ہیں ان کی درآمد کو روک دیا جائے گا۔ برطانوی وزیراعظم نے اس امید کا اظہار کیا ہے کہ اس سال کے آخر تک خطرناک کتوں کی اس نسل پر پابندی عائد کر دی جائے گی۔ سوشل میڈیا پر اس حوالے سے ویڈیو بیان میں برطانیہ کے وزیراعظم رشی سونک نے کہا کہ یہ کتے 2021 سے کم از کم 14 انسانی اموات کا باعث بنے اور یہ بچوں اور کمیونٹیز کے لیے خطرہ ہیں۔ برطانوی وزیراعظم نے اس نسل کے کتوں کے انسانوں پر حملوں کی ویڈیوز اور لوگوں میں پائے جانے والے خوف و ہراس کا ذکر کرتے ہوئے کہا ہے کہ اس نسل کے کتوں پر پابندی کے لیے فوری کام کرنے کی ہدایت دے دی ہے تاکہ لوگوں کو محفوظ رکھا جا سکے۔ برطانوی وزیراعظم نے کہا کہ اب یہ واضح ہو گیا ہے کہ مسئلہ چند بری تربیت یافتہ کتوں کا نہیں بلکہ ان کے رویے کا ہے۔ انہوں نے مزید کہا کہ مالکان کی ذمے داری ہے کہ وہ اپنے کتوں کو کنٹرول میں رکھیں، میں لوگوں کو یقین دلانا چاہتا ہوں کہ ہم ان حملوں کو روکنے اور عوام کی حفاظت کے لیے فوری طور پر کام کر رہے ہیں۔

کریڈٹ: انڈیپنڈنٹ نیوز پاکستان-آئی این پی