بنگلہ دیش میں دریا میں کشتی الٹنے سے ہلاک ہونے والوں کی تعداد32ہوگئی جبکہ متعدد افراد تاحال لاپتہ ہیں جن کی تلاش جاری ہے ۔غیر ملکی خبررساں ادارے کی رپورٹ کے مطابق بنگلہ دیشی حکام کا کہنا ہے کہ گزشتہ روز کشتی کے حادثے میں لاپتہ ہونے والوں میں سے بعض افراد کی لاشیں ملی ہیں جس کے بعد ہلاکتوں کی تعداد32ہوگئی ہے جن میں 16خواتین اور 10بچے شامل ہیں۔ مزید افراد کی تلاش کے لیے رسیکیو اور غوطہ خور کاوشوں میں مصروف ہیں۔پولیس کا کہنا ہے کہ کشتی میں 50 ہندو زائرین سوار تھے جو صدیوں پرانے مندر کی طرف جارہے تھے کہ شمالی بنگلہ دیش کے بوڈا قصبے کے قریب دریائے کروٹوا کے بیچ میں کشتی اچانک کسی چیز سے ٹکرا کر ڈوب گئی۔مسلم اکثریتی ملک بنگلادیش میں ہر سال ہزاروں ہندو زائرین بودیشوری مندر جاتے ہیں۔ بنگلہ دیش اور مشرقی بھارت میں میں ہندو برادری کے سب سے بڑے مذہبی تہوار درگا پوجا کی ابتدا تھی جس کی وجہ سے قدیم مندر پر بڑی تعداد میں زائرین کا ہجوم جمع ہوا ہے۔ناقص دیکھ بھال اور گنجائش سے زیاد مسافروں کی سواری کی وجہ سے کشتیوں کے سانحات بنگلہ دیش میں عام ہیں۔اسی طرح گزشتہ سال ایک اور مسافر کشتی کے دوسری کشتی سے تصادم کے بعد ڈوبنے کے نتیجے میں کم از کم 32 افراد جاں بحق ہوگئے تھے۔

کریڈٹ: انڈیپنڈنٹ نیوز پاکستان-آئی این پی