طوفانی ہوائوں، بارش اور ژالہ باری نے امریکا کی 10مشرقی ریاستوں میں تباہی مچا دی، مختلف حادثات میں 2افراد ہلاک ہو گئے،تفصیلات کے مطابق گزشتہ دنوں مشرقی امریکا میں ایک طاقت ور طوفان نے تباہی مچا دی ہے، جس میں کم از کم دو افراد ہلاک ہو گئے، تیز ہوائوں کے ساتھ بارشوں کے نتیجے میں ہزاروں مکانات کو نقصان پہنچا، سینکڑوں درخت جڑوں سے اکھڑ گئے، بجلی کے کھمبے گر گئے، نیویارک سے الاباما تک 11لاکھ سے زائد گھروں اور کاروباری مراکز میں بجلی کی فراہمی معطل ہو گئی،مشرقی امریکی ریاستوں میں خراب موسم کے پیشِ نظر ہزاروں پروازیں منسوخ اور تاخیر کا شکار ہوئی ہیں، طوفانی ہوائیں چوبیس گھنٹوں سے بھی زیادہ وقت تک چلتی رہیں، اور بجلی منگل کی رات تک منقطع رہی، جب کہ 5 کروڑ افراد طوفانی ہواں اور آسمانی بجلیوں کی زد پر آئے، الاباما کے شہر فلورنس میں ایک پارکنگ لاٹ میں آسمانی بجلی گرنے سے ایک 28سالہ شخص کی موت ہو گئی، جب کہ سا ئوتھ کیرولائنا میں 15سالہ لڑکا ایون کرسٹوفر کنلی اس وقت موت کا شکار ہوا جب اینڈرسن کائونٹی میں اس کے دادا دادی کے گھر کے باہر اس پر درخت آ گرا،ریاست میری لینڈ کے شہر ویسٹ منسٹر میں ایک سڑک پر گاڑیوں پر بجلی کے کھمبے اور تاریں گرنے کی وجہ سے پیر کو ساڑھے پانچ گھنٹے تک درجنوں افراد کاروں میں پھنسے رہے۔

کریڈٹ: انڈیپنڈنٹ نیوز پاکستان-آئی این پی